إلى شدوك البوليس أو الجوندارم بتهمة معينة .. كيفاش خاصك تتصرف و شنو الحقوق لي كيضمن ليك القانون
جريدة طنجة – حسيمة سيتي ( حقوقك يا مواطن)
الخميس 02 مارس2017 – 15:24:19
من الجديد لي جا به دستور 2011 فهاد الباب وأكد عليه قانون المسطرة الجنائية أنه أي مواطن شدوه البوليس أو الجوندارم و داروه تحت ما يسمى “بالحرسة النظرية” باش يحققو معاه عندو الحق :
أولا : يعرف التهمة الموجهة ليه ( يعني ماشي يقولو ليه زيد معانا وغاتعرف علاش !!).
ثانيا: عندو الحق يتصل بالمحامي ديالو أو لا يطلب من الشرطة القضائية بنفسها تعين م…حامي باش يقدم ليه مساعدات قانونية و يوريه ما يدير.. لأن شحال من واحد بريء و كيمشي ضحية لأنه ما عرفش شنو يقول فمحضر الاستماع ووقع على شي حاجة اللي ما دايرهاش تحت ظغط الشرطة القضائية.
ثالثا: عندو الحق يتاصل بأحد الأقارب باش يساعدو.
رابعا : عندو الحق يلزم الصمت و ما يصرح حتا بشي حاجة.
● طبعا إلى بان ليه شي تجاوز فاستعمال السلطة عندو الحق يقدم شكاية لوكيل الملك.
● “الحراسة النظرية” ماشي هي “الاعتقال الاحتياطي” ..الأولى كتخاذ من طرف الشرطة القضائية خلال البحث البوليسي و الثانية من لدن قاضي التحقيق خلال التحقيق الاعدادي والمرحلة القضائية….
المراجع :
– دستور المملكة المغربية (الفصل 23)
– قانون المسطرة الجنائية (المادة 66)
