فويـرا أمـانديس – Fuera Amendis
جريدة طنجة – محمد وطاش
الجمعة 16 اكتوبر 2015 – 12:48:16
أونا دوس اطريس فويــرا أمــانديس
اجمع الحْساب بالماكينة واللابيس
تْشوف بعينيك مادارت فينا أمانديس
اللي مْرمدات ريوسنا في الغيس
ميس، موراميس ، موراميس
***
أونا دوس اطريس فويــرا أمــانديس
انفقنا ما ف الصرة والكيس
بعنا الزرابي والملابيس
انباتوا انفكروا كل جمعة وخميس
باش نرضيوا الضاوية ف طنجيس
***
أونا دوس اطريس فويــرا أمــانديس
ليلي ياعيني على أمانديس
تقول غير عايشين ف باريس
اشحال من واحد بدل لاضريس
ولا موالين الضو بغاو ينعلوا إبليس
***
أونا دوس اطريس فويــرا أمــانديس
دخلت عليكم ببركة بوعراقية يامناحيس
اللي حطمتوا الرقم القياسي في التدليس
واش باقي ما شباعتوا من التبزنيس؟
بالزيادة كيف العادة حطمتوا أرقام غينيس
***
أونا دوس اطريس فويــرا أمــانديس
اعطونا الأمان باركا من التوسويس
والعيب الكارطة بالضميس
واش باقي ما شباعتوا من الطميس؟
راه الدراوش غارقين في التكرفيس
ما بقى ليهم غير يشعلوا شمع مولاي ادريس
ويسقيوا الما بالقافلة من واد اغريس
أونا دوس اطريس فويــرا أمــانديس .
***
الزّجال محمد وطاش
