خِصـام بين القَهْـوة والشاي..

فلنَسْتَمع إليهما من خلال هذه الدَرْدَشة عَساـنا نسبر غَوْر أعماقهما ونكشف كُنْهَ عَلاقــاتهما ومدى انسجامهما أو تنـافُرهما:

الإبريق (يغط في نومه شاخرا ناخرا): خرر..خرر..شش..خرر..شش.
البراد (يوقظ الابريق ساخرا): فق فق ألبريق بارك عليك من الشهيق.
الإبريق (يتململ في مضجعة متوترا): أودي راك عيقت علي بارك علي من النهيق.
البراد (معاتبا): فق فق ألخاوة، اللهم النهيق ولا الشخير والشهيق.
الإبريق (يقفز لتوه ساخطا): آش أوا بغيتي عندي ياهاذا الزنديق؟!
البراد (مكخكخا): كخ كخ كخ.. بغيت نهرد معك الناب شوية ف الطريق.
الإبريق: سير بعد مني.. جيتي حتى لبلاصت الصابون بغيتي تتعلم الزليق؟!
البراد: هاي هاي هاي!!! شحال غلاظ ليك الراس يا هاذا البريق!
الإبريق: ما نعرف شكون اللي غلاظ ليه الراس آش أنا ولا انت اللي عزيز عليه الدحاس ف الضيق!؟
البراد: شوف ألعدو/ الصديق.. خطيني عليك من التخربيق واجي انتكلموا ب المنطق.
الإبريق: ما عندي ما ندير بـ المنطق والكلام اللي ما فيه ما يليق.
البراد: مالك امقلق أسي…؟ ياك ما خصك شي قهوة تفاجي عليك الضيق وتزول منك الحريق؟!
الإبريق: إلى بغيتي التحقيق.. الهضرة معاك كتنشف الريق.
البراد: لا لا لا… واخ تقول اللي قلتي.. لازم خصك شي قهيوة باش تعيق.. ياك ما طلعات ليك القهوة ف الراس ألبريق؟!..
الإبريق: انتم البرارد اللي طلعتوا لينا ف الراس.. آح كون كان عندي القرطاس؟!
البراد: القرطاس؟! الله إيحد الباس!
الإبريق: إيوا مالك أخويا طيرتي مني النعاس؟!
البراد: آه شحال فيك ديال الوسواس؟! خرجات عليك القهوة يا عباس.
الإبريق: ما خرج علي غير أنت وشي ناس.

البراد: شكون هاذا الناس؟!
الإبريق: هاذوك اللي ما عندهوم لا ذوق لا إحساس، هاذوك اللي كيشربوا أتاي كاس مور كاس.
البراد: علاش ما ف خباركش أتاي كيزيد الحماس؟!
الإبريق: آه! قولي داكشي علاش نقصوا ف الثمن ديالو باش إيزيدوا ف الحماس؟!
البراد: ها انت عاد فهمتي يا بوراس.

الإبريق: الفهامة ف الراس والخسارة ف الكراس.
البراد: خصك تعرف بأن أتاي أساس التنمية، هو الدوا ديال الميزيزية.. وحنا البرارد ديما خدامين صباح وعشية.
الإبريق: حرمتوا علينا السوق أها ذوك البانضية.. مصاب إيزيدوا ف السكر شوية.
البراد: لا لا لا .. منين نقصوا من الثمن ديال أتاي غادي إيزيدوا شوية فالقهوة ما تكون غير على خاطرك يا بوشاشية.
الإبريق: إيزيدوا ولا ينقصوا.. آش من ربح عندك ف القضية؟!

البراد: القضية ف الطاقية.. القضية كلها ربح مع صحاب الصينية.
الإبريق: صحاب الصينية؟!
البراد: إيه صحاب الرشوق والتسلية ما كاين غير شحر وحط ف الصينية.. كيسان حياتي دايزين بي.. كيف الوزير دايرة به الحاشية.. وانت ياولدي حياتك مشات خطية.
الإبريق: الله يجعل البركة ف القهواجية وصحاب الدكوك الشعبية.
البراد: هزك الما يا لبريق.. القهواجية عندهم كفاتيرات بخارية.
الإبريق: إلى ستغناوا علي القهواجية ما يتخلاوا على الحشايشية وصحاب كل بلية.
البراد: طلعت ليهم ف الراس.. ما بقات فيك مزية.

الإبريق: وانت ماطلعت ليهم ف الراس يا بورزة حمرية؟!
البراد: الرزة حمرية رمز التضحية.. حضوري لازم ف كل مناسبة – وطنية، دينية، مواسم فلاحية ـ وانت يالبريق ماعندك لا جنسية مغربية ولا هوية وطنية.. بحالك بحال شحال من سلعة دخلات البلاد مخفية.
أما خويك فوق الراس عمامة كنفرح اليتامى.. جربني تعرفني.. أنا البرد عليه يتجمعوا الحباب والصحاب ويطوفوا عليه وعلى كيسانو النحل بلا حساب.
جربني بنعانع مكناسية ولا تزينية ولا حتى بشي ربيطة مصاورية، باش تعرف قيمتي ف البلاد ياقليل النية.

نُقدم لكم أتاي اتخاصم مع القهوة، ومانْفْعَتُو خْصومَة:
قالت لو القهوة: أنا كحلة القمقومة، اسنات علي الحكومة يشربوني الناس مع الصباح، واتقيل شبعانة مكهومة، وإذاجا الضيف كنستر الحشومة ما شي بحالك حر يمل معلق ف الردومة.

قالها أتاي: أنا أتاي ؤ أتاي بلية والناس كلها مصدقة، كيشربوني ف الصباح ويشربوني ف العشية، أنا جيت ملكك ف البكية، عندي أربعة دالنجوم ؤ الكتابة عربية، اسنات علي الدولة الوطنية، ماشي بحالك ألقهوة أنت كحلة مقلية كتباني بحال البريو ديال القنية.
قالت القهوة: أنا القهوة كحلت الصيفة كيشربوني القايد والخليفة، واللي ما شافني شي دايزة عليه احسيفة.

قال أتاي: أنا أتاي الحار، جيت ملكك ف البكية دالخنجار.. دايرين لي الحوانت ف كل دوار ماشي بحالك ألقهوة، كحلة كيف الغبار، واللي شربك كينعس ف السبيطار.

قالت القهوة: أنا القهوة أصلي حبوب، والله إلى كحلة ما في كذوب، البريق كيتشحر بالعوافي كيذوب، الرابوز كيسوط بالعوافي مثقوب، المجمر حامي بالعوافي مقلوب.

قال أتاي: أنا أتاي المنسوم، جيت ملكك، عندي أربعة دالنجوم، أتاي بلا إقامة كلو مظلوم، ماشي بحالك كحلة بحال الحموم.
قالت القهوة: أنا القهوة عندي الراس، جيت ملككة من فاس.. دايرين لي البرارد من النحاس، كنفيقهم ف الصباح باقيين ف النعاس.. البريق كيتشحر ويعمر الكاس ماشي بحالك انت طيحت لنا الضراس، اخرج يا ولد الحرام اغطس اخلاص.

قال أتاي: أنا أتاي المزيان، في الصدق ؤ في لمان، جيت ملكك على يد سيدنا مولاي الحسن، ما بقيتش كنتباع ف الجورنان، ما شي بحالك ألقهوة كحلة بحال القطران، سيري بحالك راك وسختي الكيسان.

قالت القهوة: أنا شادة البلاصة، الناس كلها علي عساسة، اللي قاريين واللي مدوزين ف المدرسة، ماشي بحالك أيتاي غا حلاسة، كيشربوك غا السراح ولاكاين شي خماسة.
قال أتاي: ؤ أتاي الزعامة، مانحتاج إقامة، والناس علي خدامة، لا اللي ف الأرض ولا اللي ف السما، ماشي بحالك القهوة كحلة بحال الرخامة.

قالت القهوة: أنا القهوة كحلة مسكينة، الناس كلها تبلات بي اللي ف البادية، واللي ف المدينة، سير بحالك أيتاي، بهذلت بنا اتبعت ب كبالة.. هذا كلام مول النخالة.